Galicia Ártabra Noticias de Ferrol y la comarca de Ferrolterra.
A XVII Feira Rural de San Sadurniño botou o peche este pasado sábado 29 tras unha intensa xornada na que a chuvia acabou sendo a principal protagonista pero non impediu que a feira mantivese un bo ambiente nin que os postos rexistrasen un volume de vendas razoable, tendo en conta as circunstancias.
A oferta da feira completouse con produtos da horta, lácteos, pan e doces, xunto con artesanía, ferramentas, maquinaria e artigos de segunda man, unha mostra de rochas do Xeoparque e incluso coa entrega gratuíta de libros procedentes do último expurgo bibliográfico da Biblioteca Municipal. E tamén con música: na primeira metade do día coa Charanga Alxibeira e na segunda cunha exquisita actuación das pandereteiras da mesma agrupación naronesa.
O Goberno local fai un balance positivo da xornada. O concelleiro de Desenvolvemento Local, Manolo Varela, segundo explicou, a mañá contou cunha afluencia «máis que razoable», pero a chegada da chuvia ao mediodía fixo que a presenza de público diminuíse. «É unha feira e non todos os anos van ser fabulosos no climatolóxico», engadiu.
En canto ás vendas, o responsable municipal sinalou que o balance trasladado polos postos foi tamén razoable, tendo en conta as condicións da xornada. «Hai feiras que saen mellor e outras peor» mencionou, en alusión a que as vendedoras e vendedores «entenden o que é o mal tempo» e, malia a chuvia, «foron vendendo».
Varela tamén se referiu ao balance das actividades: desenvolvéronse as visitas guiadas á horta de froiteiras Carlos Fornos e ao colmear didáctico, houbo degustacións e tamén tivo lugar, anque deslucido pola auga, o concurso morfolóxico da Raza Can de Palleiro. Porén, o concelleiro quixo destacar o «éxito» dos encontros con Nuska Chousa, tanto pola resposta e a participación do público como pola coincidencia entre o seu discurso e o espírito da Feira Rural: «O discurso que ela ten encaixa perfectamente coa filosofía da nosa feira».
Nuska Chousa pola súa banda falou dunha maneira de entender o cultivo da terra baseada nos coñecementos e prácticas transmitidos durante xeracións, pero incorporando tamén os coñecementos dos que dispoñemos hoxe. Unha forma de facer agricultura que procura manter o equilibrio da terra, das plantas e doutros organismos e que, como apuntou durante as charlas, hoxe recibe etiquetas como «ecolóxica» ou «sustentable», aínda que na realidade bebe de moitos dos saberes tradicionais que sempre estiveron presentes no rural.
