O campo da Veiga acolle o XXXII Trofeo de Fútbol Concello de San Sadurniño

A UDC Narahío e o CF San Sadurniño enfrontaranse este domingo 30 de agosto, ás 18:30 horas, no campo da Veiga -Naraío- na XXXII edición do Trofeo de Fútbol Concello de San Sadurniño. Un clásico que será o primeiro e, salvo que se concerte algún amigable, único derbi local da temporada 2026-2027 que está a piques de comezar.

O ascenso do Sansa á Primeira Futgal fará que ambos equipos compitan este ano en categorías diferentes. Despois dun mes de agosto con varios encontros de preparación, o trofeo servirá para comprobar sobre o terreo de xogo como chegan os dous conxuntos ao inicio da nova campaña. Este ano queda para máis adiante -posiblemente en setembro- a disputa do trofeo feminino, que debeu de adiarse por causa de incompatibilidades de axenda dos equipos convidados.

Este derbi chega despois dunha temporada 2025-2026 especialmente brillante para o fútbol local. Tanto Narahío como Sansa fixeron méritos para disputar a liguiña de ascenso a Primeira Futgal, nunha carreira final na que os dous estiveron loitando polo salto de categoría. Finalmente foi o conxunto de San Sadurniño o que conseguiu o ascenso, pero o rendemento do Narahío tamén deixou unha base máis que sólida para afrontar o novo curso.

Por iso, nos dous equipos a aposta para esta temporada pasa, en boa medida, por dar continuidade ao traballo feito. Se as cousas funcionan, mellor non tocalas —ou facelo o mínimo imprescindible—, reforzando aquelas posicións nas que sexa necesario para manter o nivel competitivo.

Así, no caso da UDC Narahío, Carlos Andrés Ramallo continuará á fronte do equipo, mentres que Serxio repetirá como capitán e Rafa seguirá defendendo a portería como titular. Tamén continúan Roi Picos, Baba, Diego Durán Eric, Abel, Miguel, Wudy, Santi, Pablo, Adri, Adri Pico, Pocholo, Borja, Jorge, David, Kevin, Imanol, Alberto e Cristian. O conxunto de Naraío comunicou ademais a incorporación de dúas caras novas: Marcos Piñeiro, procedente da Cultural Maniños, e Javi Vizoso, que chega desde o propio San Sadurniño. Dous reforzos que se incorporan a un bloque que xa demostrou a pasada temporada estar en condicións de competir polos postos altos.

No Sansa tamén se optou pola continuidade despois do ascenso. Andrés “Nesy” Otero seguirá como adestrador e Fernando Aneiros “Penano” continuará encargándose da preparación dos porteiros. Tamén permanecen no equipo o capitán, Antón Senra, secundado por Fer Sedes, Christian Caamaño, Rupa, Adrián Collado, Yowi, Josiño, Martín Romero, Martín Aguilar, o porteiro Bruno Picos, Seny Sohna, Sergio Vigo, Cristian Varela, Hugo Pita, Dani Otero e Álex Barro.

Á lista de continuidade súmanse catro incorporacións. O central David Beade chega procedente da SD O Val, mentres que desde o Barallobre se incorporan Aitor e Óscar Calvo. A cuarta novidade é Juan Muíños, que regresa ao equipo laranxa tras pasar tamén polo Barallobre e o Perlío, equipo este último co que xa xogou na Primeira Futgal.

O Trofeo Concello de San Sadurniño será así unha boa oportunidade para ver en acción as novas versións de dous equipos que comparten territorio, rivalidade e unha temporada histórica ás costas, pero que este ano tomarán camiños diferentes. O domingo, na Veiga, volverán medirse polo orgullo de gañar o noso derbi e facerse cun trofeo que xa chega á súa 32ª edición.

O balón porase en xogo ás 18:30 horas do domingo 30 de agosto no campo da Veiga. Este ano, por problemas de axenda dos equipos convidados inicialmente, non será posible celebrar o mesmo día o trofeo feminino. A cita das mulleres queda pendente para o mes de setembro, previsiblemente.