Juan Galán presenta en Valdoviño «Rotspanier. Un miliciano galego no exilio francés 1939-1945»

A través dunha exposición do máis didáctica, o escritor e investigador Juan Galán presentaba o venres pasado á tardiña en Valdoviño «Rotspanier. Un miliciano galego no exilio francés 1939-1945«. O acto celebrábase na Biblioteca Municipal, e formaba parte do programa municipal de actividades de recuperación da memoria democrática que promove o Concello co apoio da Deputación da Coruña.

A concelleira de Cultura, Tamara Sabín, daba a benvida ao público asistente e agradecía a presenza do autor, que presentaba por primeira vez no municipio unha das súas obras. O libro, editado por Galaxia, recolle 4 anos de intenso labor de investigación e documentación.

Trátase dun ensaio sobre o exilio francés e unha biografía documentada sobre Joaquín Fernández Millán, un mariñeiro da Pobra do Caramiñal emigrado a Euskadi na década de 1920 que loitou como miliciano no Exército de Euskadi. Como tantos outros españois, a inicios de febreiro de 1939 cruzou os Pirineos para exiliarse en Francia, onde sería internado en campos de concentración durante a Segunda Guerra Mundial, forzado a traballar en compañías de traballo (CTE e GTE) na zona controlada polo Goberno de Vichy, e, posteriormente, para a Organización Todt, na zona ocupada polos nazis, na construción do Muro Atlántico.