A agrupación socialista inicia unha campaña de afiliación

A Agrupación Socialista de Ferrol inicia unha Campaña de Afiliación, unha iniciativa que ten como novedoso un programa titorial, xa que, como destacan dende a Executiva Local, resulta de grande importancia a recepción, formación e capacitación de toda aquela persoa que inicie a súa militancia neste partido.

«Dalle vida ás túas ideas» é o nome desta iniciativa que nace este ano, como subliñan dende a dirección do PSdeG-PSOE de Ferrol, porque “no contexto de novos tempos se esixen novas respostas e ti decides”. O obxectivo da campaña é acadar un novo afiliado por cada militante socialista en Ferrol nos próximos 12 meses.

Esta campaña inclúe o desenvolvemento dun Plan de Formación e Capacitación da militancia a través dun grupo de formación integrado polos membros da Executiva Local –liderados pola súa secretaria xeral, Beatriz Sestayo- e militantes de base, que tamén participarán aportando os seus coñecementos. Así mesmo, está prevista a elaboración dun manual de información da Agrupación Socialista local. Hoxe mesmo, ás seis da tarde, están convocados na sede do PSdeG-PSOE de Ferrol (Pardo Bajo) os voluntarios e voluntarias que, xunto coa Executiva, queiran desenvolver o programa con obxecto de contribuír á recepción dos novos compañeiros e compañeiras de partido e colaborar na súa formación política como socialistas. Uns días máis tarde, o xoves 10, reunirase na sede –tamén ás seis da tarde- o grupo de formación para a elaboración do plan de formación.

Ademais, o día 17 deste mes haberá un curso de cibermilitancia, con aplicación das novas tecnoloxías que permita a información en tempo real de diversos aspectos cotiás en colaboración co Observatorio Social da Agrupación, que dirixe Carlos Piñeiro.

As persoas interesadas en participar nesta iniciativa poden acudir a estas citas ou ben chamar á sede 981 320 480 de luns a venres polas tardes, entre 17.00 e 20.00, ou acudir persoalmente neste mesmo horario.