Ferrol lembra ás vítimas de violencia de xénero

O 25 de novembro conmemórase o Día Internacional da eliminación da violencia contra a muller e o alcalde de Ferrol, José Manuel Rey Varela, xunto a representantes da corporación municipal, e a delegada territorial da Xunta en Ferrol, Martina Aneiros,  participaron no acto institucional celebrado na mañá do citado día.

O alcalde de Ferrol, José Manuel Rey Varela, xunto cunha representación da corporación municipal, a delegada territorial da Xunta e representantes de entidades sociais da cidade, Policía Nacional e Garda Civil, presidiu este 25 de novembro  o acto institucional conmemorativo do Día Internacional da eliminación da violencia contra a muller, que se celebrou no salón de recepcións do Concello.

Antes de dar comezo o acto gardouse un minuto de silencio polas 1333 vítimas de violencia de xénero  que están computadas dende o ano 2003. Presentou o acto de homenaxe e recordo a xefa de protocolo do concello, Leonor Bermejo Fanjul.

 A concelleira de Muller, Elvira Miramontes fixo lectura da declaración institucional, que recolle que o número de mulleres asasinadas polas súas parellas ou exparellas no que vai de 2025 ascende a 38, e a 1.333 desde o 2003, cando se iniciou a recollida destes datos.

Así mesmo, o manifesto condena cada acto, cada agresor e tamén e a quen nega, minimiza ou xustifica a existencia desta violencia e recoñece o compromiso da cidadanía galega na loita contra a violencia machista.

Tomou seguidamente a palabra o alcalde de Ferrol, José Manuel Rey Varela. quen agradeceu á concelleira da Muller Elvira Miramontes o seu labor na configuración deste acto e de toda a programación establecida en torno a esta data

“Un ano máis, amosamos a nosa repulsa contra a violencia de xénero e non damos a esquecemento a ningunha das súas vítimas, tal e como reza o lema escollido este ano”, manifestou o alcalde. Así mesmo, lembrou que a violencia de xénero segue a ser un problema social de primeira orde que precisa da unión de toda a sociedade para erradicala. Neste sentido, amosou o total compromiso do Concello de Ferrol na loita contra a violencia de xénero..

Por último, todos os presentes leron frases reivindicativas contra a violencia de xénero, entre éles membros da corporación; a delegada territorial da Xunta; a comisaria xefe da Policía Nacional, Cristina Ochoa Nadal; o tenente da Garda Civil, Alfonso Castro Villa; o presidente das asociación de veciños do rural, Manuel Sendón; e a Sendón; e a representante da asociación de mulleres «Xuntas medramos«.

Rematada a lectura das frases reivindicativas o cuarteto da  Banda Ferrolá de Música formado pro Ana Vergara Pérez (trombo); Esteban Barcia Galego (trombón); Silvia Balseiro Gregorio (clarinete) e Alejandra Medín Doce, clarinete); interpretaron «La fille aux cheveux de Lin, de Claude Bedussy», «Negra Sombra, de Xoán Montes»; «Lela, de Rosendo Mato»; e «Praeludium, de Clara Schumann».

Aplausos e o acto finalizou co despregamento dunha pancarta conmemorativa no balcón do pazo municipal.

Todas aquelas vítimas de violencia de xénero poden recibir axuda a través do teléfono 016, mediante consultas en liña a través do enderezo electrónico 016- online@igualdad.gob.es; da canle de WhatsApp no número 600 000 016 e do chat en liña, accesible desde a páxina web www.violenciagenero.igualdad.gob.es/.

PROGRAMACIÓN 25N

O Concello de Ferrol artellou unha amplia programación arredor desta data. O xoves 27, ás 19:00 horas na Casa da Muller, levarase a cabo o coloquio Ferrol en feminino que disertará sobre A invisibilidade da muller nas artes como causa de violencia de xénero coa historiadora Marisé Pena. E ao día seguinte, no Edificio social, a xornada A cara B das violencias machistas, de 10:30 a 13:30 horas.

Tanto o venres 28 como o sábado 29, durante todo o día, nos locais hostalería poderase ver o espectáculo itinerante de microteatros contra a violencia machista.

E súmanse dous actos máis o sábado 29 ás 12:00 horas na AVV de Viladóniga-Vilasanche o obradoiro en familia Únete para poñer fin á violencia dixital, e pola tarde ás 19:30 horas no teatro Jofre o acto cidadán contra a violencia de xénero, coa lectura da declaración institucional do 25N, proxeccións audiovisuais protagonizadas pola sociedade ferrolá e as actuacións musicais a cargo de Violeta Veinte e da Cía de Fran Sieira.

O domingo 30 está prevista a VI Carreira e Andaina contra a Violencia Machista e a III Marcha Ciclista do Concello de Ferrol, con saída en ambos casos ás 11:00 horas do Cantón de Molíns. Para participar tanto na carreira como na andaina, as inscricións poden realizarse na páxina de carreiras galegas e o prazo finaliza o 27 de novembro ás 23:59 horas. O xoves 27 e o venres 28 entregaránse os dorsais e camisetas na Casa da Muller de 09:00 a 14:00 horas e tamén o mesmo día da carreira dende as 09:00 horas ata o inicio da mesma.

Ademais, levarase a campaña do 25N a encontros deportivos do Club Universitario de baloncesto Baxi, o Parrulo Fútbol Sala, Abeconsa Basketmi Ferrol e Racing de Ferrol.