Galicia Ártabra Digital Noticias de Ferrol y la comarca de Ferrolterra.
A Confederación de Empresarios de Ferrolterra, Eume e Ortegal (COFER), en colaboración co Concello de Ferrol, levará a cabo unha innovadora formación dirixida a fortalecer as competencias de liderado e xestión de equipos en emprendedores e profesionais.
O curso, titulado “Programa de Liderado e Xestión de Equipos con LEGO® SERIOUS PLAY®”, desenvolverase os días 2, 3 e 4 de decembro, de 09:30 a 13:30 horas na sede de COFER na Malata, en Ferrol. Este programa práctico empregará a metodoloxía LEGO® SERIOUS PLAY® para ofrecer unha experiencia única de aprendizaxe baseada en
dinámicas de grupo, simulacións prácticas e a construción de modelos visuais, e será impartido por Implicatum.
Un programa práctico e innovador
O curso estrutúrase en tres sesións específicas:
1. Técnicas de Liderado Efectivo: Introdución ás teorías e prácticas de liderado, onde as persoas participantes poderán representar e analizar distintos estilos a través da construción de modelos con LEGO.
2. Estratexias para a Motivación e Xestión de Equipos: Sesión centrada na resolución de conflitos, a motivación e a comunicación efectiva.
3. Prácticas de Resolución de Conflitos e Team Building: Actividades para fortalecer a cohesión e confianza dos equipos, simulando retos reais e propoñendo solucións prácticas.
O curso ten como finalidade dotar aos participantes de ferramentas para mellorar as súas habilidades de liderado, fomentar a colaboración e potenciar a resolución de conflitos, nun formato innovador que combina creatividade e aprendizaxe visual.
Inscrición gratuíta e prazas limitadas. As persoas interesadas poden inscribirse enviando un correo a formacion@cofer.es co seu nome completo, empresa (se procede), DNI, teléfono de contacto e correo electrónico. Tamén poden contactar nos números 981 333 305 ou 981 333 322.
COFER reafirma así o seu compromiso coa formación e a innovación, ofrecendo recursos que axudan ao desenvolvemento persoal e profesional das persoas emprendedoras e profesionais da comarca. Para máis información, visite www.cofernet.com.
