Galicia Ártabra Digital Noticias de Ferrol y la comarca de Ferrolterra.
O concelleiro de Deportes, Ibán Santalla, presentou con Juan Manuel Caneiro e Luisa García, presidente e vicepresidenta respectivamente do Círculo Xadrez Narón, a cuarta edición do Torneo promoción de xadrez –circuíto galego- que se desenvolverá este sábado 21, no centro cívico social do Alto do Castiñeiro.
O prazo deinscrición neste evento permanecerá aberto ata este xoves, día 19, ás 12:00 horas, podendo tramitalas a través da web: www.xadreznaron.es.
A Federación Galega de Xadrez organiza a convocatoria co Círculo xadrez Narón e o Concello de Narón, contando coa colaboración doutras entidades e empresas.
Os representantes do club local indicaron que se trata dun evento dirixido a nenos para os que se estableceron as categorías sub 8 (promesas), sub 10 (benxamíns), sub 12 (alevíns) e sub 14 (infantís) e recordaron que para poder participar é preciso estar federado na tempada actual. A día de hoxe está confirmada a asistencia de xogadores de xadrez locais e tamén procedentes doutros concellos.
As diferentes roldas, un total de sete, comezarán a xogarse ás 11:00 e sucederanse cada hora pola mañá ata as 13:00 e pola tarde de 16:00 a 19:00 horas, estando previsto o remate da convocatoria e a entrega de premios sobre as 20:00 horas, tal e como indicaron dende o club local.
Haberá trofeos para os cinco primeiros clasificados de cada categoría, medallas para todos os participantes e tamén se repartirán agasallos entre os participantes trala realización dunha serie de sorteos.
O concelleiro de Deporte, Ibán Santalla, valorou o feito de que un ano máis se celebre en Narón este torneo e animou a inscribirse no mesmo a todas as persoas interesadas. A sí mesmo, felicitou ao club local polo labor que desenvolve ao longo do ano e animouno a continuar traballando na actual tempada ao igual que nos últimos anos.
