Galicia Ártabra Digital Noticias de Ferrol y la comarca de Ferrolterra.
Na actualidade o Museo conta cun arquivo dixital de máis de 3.500 instantáneas, que foron doadas pola veciñanza das Pontes e que recollen boa parte do pasado recente da vila das Pontes de García Rodríguez, dende finais do século XIX ata o XX.
Este novo caderno que leva por título «O paso do tempo», está financiado con cargo a unha achega da Deputación da Coruña para o ano 2023, e recolle unha escolma das imaxes máis significadas en cada un dos eidos sobre os que o autor José María López Ferro, realiza unha crónica dando conta dos feitos máis salientables durante o século XX.
A vella escola, a emigración, o agro, os oficios, a industria, o urbanismo, as festas e romarías, o deporte…, son algunhas das temáticas sobre as que versa este novo caderno, que vai xa polo seu número 6.
O acto de presentación pública será conducido por López Ferro autor da obra e cronista oficial das Pontes, que estará acompañado polo escritor Ramón Loureiro quen realizou o prólogo e ten unha fonda relación coa vila das Pontes. A presentación terá lugar o vindeiro venres día 12 de xullo ás 19:00 horas na Praza da Igrexa das Pontes. A entrada será de balde e os asistentes recibirán un exemplar gratuito da obra.
