Narón acolle as finais da Copa Deputación de Fútbol

O Estadio Municipal Río Seco de Narón acolle este sábado 22 de xuño, as finais masculina e feminina da Copa Deputación da Coruña de Fútbol. A entrada será de balde para o público.

Tras as eliminitorias disputadas o pasado domingo, pola mañá disputaranse os partidos para o terceiro e cuarto posto e pola tarde as finais masculina e feminina programadas cos seguintes horarios:

-Final feminina 16.30 horas. Victoria B CF – EFM Boiro

-Final masculina 19.00 horas. San Tirso SD – SD O Val de Narón

Ás 20.45 horas, o presidente da Deputación, Valentín González Formoso, e o deputado de Deportes, Antonio Leira Piñeiro, xunto con directivos da Federación Galega de Fútbol e representantes do Concello de Narón serán os encargados de entregar a Copa aos equipos gañadores.

A Copa Deputación da Coruña  repartirá este ano un total de 28.000 euros en premios, recibindo 5.000 euros e un trofeo os campións, 4.000 euros os subcampións, 3.000 euros os terceiros clasificados e 2.000 euros os cuartos.

Os equipos gañadores das categorías masculina e feminina da Copa Deputación da Coruña conseguirán unha praza para a Supercopa Deputación, que disputarán cos gañadores das outras competicións homólogas que se xogan nas provincias de Lugo, Pontevedra e Ourense. O vencedor da Supercopa Deputación participará na fase previa da Copa do Rei de fútbol a vindeira tempada.

Toda a información, resultados, incidencias e notificacións desta competición realizaranse a través da páxina web www.futgal.es e a intranet da propia federación, nunha xanela específica para a I Copa de Fútbol Afeccionado Deputación da Coruña.