Galicia Ártabra Digital Noticias de Ferrol y la comarca de Ferrolterra.
Cerdido celebra o domingo 7 de abril, a súa Feira do Cabalo, que cumpre este ano 30 anos de historia.
As persoas afeccionadas ao mundo ecuestre poderán gozar un ano máis desta cita na localidade de Cerdido. A partir das 15:30 horas, terá lugar o concurso de andadura galega tradicional, que conta cun total de catro categorías nas que se elixirán tres gañadores: Serrada -1.5, Chapeada – 1.5, Serrada + 1.5 e Chapeada +1.5. Ademais, tamén se recoñecerá ao mellor poldro menor de 2 anos e ao mellor semental.
Estes recoñecementos corren a cargo dos colaboradores do evento, os locais hostaleiros do municipio: Casa Ignacio, Casa Viuda, Rincón de Tania, Bar Elvis e Mesón Froallo.
O Concello de Cerdido outorgará o trofeo á amazona ou cabaleiro máis novo e ao máis maior, destacando a continuidade desta tradición a través das diferentes xeracións e a relevancia desta na localidade.
Será obrigatorio o uso de casco e os xinetes deben estar asegurados e inscritos na proba antes das 15:00 horas para poder participar.
Haberá churrasco baixo reserva para as persoas que o desexen, que deberán poñerse en contacto co 689 833 210.
O alcalde de Cerdido, Alberto Rey, salientou a importancia de “recuperar unha das feiras con máis tradición que se celebraban neste Concello, atraendo xente de toda a comarca”.
O rexedor destacou a súa vontade de “retomar algunha feira monográfica durante o ano como poden ser as dedicadas á castaña, ao mel, ou os freixós; que son unha forma de dinamizar a nosa cultura e dar a coñecer os nosos costumes e produtos”.
