Galicia Ártabra Digital Noticias de Ferrol y la comarca de Ferrolterra.
A Oficina de Turismo do Concello de Pontedeume vén de facer balance dos resultados obtidos no pasado ano 2023, nos que recibiu case 28.000 visitantes. A esta cifra hai que sumar os 3.830 visitantes recibidos polo castelo de Andrade.
«Estas cifras confirman a tendencia ascendente do turismo local nos últimos anos, incrementándose as cifras en máis dun 2% respecto ao ano anterior», sinalou Ángela Piñeiro, concelleira de Turismo de Pontedeume.
«Esta tendencia ascendente reflicte a aposta deste goberno pola promoción turística realizada a través dos medios de comunicación, feiras e actividades», recalcou Piñeiro.
A concelleira agradeceu en nome de todo o Goberno local «o interese de todas e todos en coñecer o patrimonio histórico, artístico e natural de Pontedeume, así como a participación nas diferentes visitas guiadas que se realizaron ao longo do ano no Centro de Interpretación dos Andrade».
Por outra banda, neste 2024 comenzaron xa as actividades, charlas e visitas guiadas destinadas á difusión do patrimonio municipal nos centros educativos.
O alumnado do CEIP Andrade puido xa desfrutar da charla «Educando en patrimonio» impartida polo persoal da Oficina de Turismo, onde se achegaron ao alumnado conceptos fundamentais sobre patrimonio, a súa relevancia ou o por qué da importancia da súa conservación.
