Galicia Ártabra Digital Noticias de Ferrol y la comarca de Ferrolterra.
Unha vintena de rapazas e rapaces de entre 13 e 17 anos participaron este mes no programa municipal Aventúra-T, organizado dende a Concellería, presidida polo edil Ibán Santalla. A iniciativa, segundo apuntou, concebiuse “como unha alternativa de ocio saudable cun carácter lúdico e ao mesmo tempo didáctico e pensado para a mocidade de Narón”. A Casa da Mocidade acolleu a maior parte da programación que se levou a cabo e que tivo unha moi boa acollida entre os participantes na mesma, tal e como asegurou Santalla.
Os menores tiveron unha primeira xornada, o día 10 deste mes, de xogos e dinámicas de presentación para iniciar outro tipo de actividades do 11 ao 15, data na que rematou. Un bautismo de surf no veciño concello de Valdoviño, obradoiros de sexualidade, de tuneado de gorras, de crosstraining e gymkana, e unha visita ao parque de aventuras RoqPark, en Viveiro, con visita ao miradoiro de San Roque incluída, completaron a programación deste ano.
“O programa Aventúra-T permite favorecer tamén as relacións interpersoais, as actividades en contacto coa natureza, a creatividade das rapazas e rapaces… todos eles obxectivos que se cumpriron con creces neste tempo de lecer activo”, explicou o edil de Mocidade.
