Impunidade medioambiental. Graves agresións no rio Baa

A Plataforma de defensa do río Baa, integrada polas sociedades: SGHN, ADEGA, VERDEGAIA,  Plataforma da defensa dos camiños e Plataforma de afectados polo polígono industrial de Vilar de Colo denuncian públicamente a impunidade na que se están a producir graves agresións medioambientais no río Baa e o seu entorno.

A poucos días da Xornada de limpeza simultánea de ríos resulta escandaloso comprobar como proliferan actuacións de verdadeiro vandalismo e a máis absoluta ilegalidade. Actos cualificados de delictivos na actual lexislación medioambiental non merecen atención algunha por parte de organismos e  administracións que teñen por mandato velar e protexer o patrimonio común.

Hoxe queremos dar a coñecer algunhas destas graves actuacións para achegar aos cidadáns e cidadás uns datos que os ilustren sobre o que está a acontecer no seu entorno e que, de non poñerlle remedio, hipotecarán o futuro das vindeiras xeracións.

O río Baa desecado. Un desvío do caudal do río nos altos de Laraxe provoca que o cauce natural permaneza completamente seco nun tramo de máis dun quilómetro, ata que outros aportes o van recuperando paseniño.

Alteración da capa freática. O deseño da autovía a Lavandeira rachou o perfil natural das brañas da cabeceira do río e provocou un desvío permanente dun importante caudal cara á bacía de Perlío.

Vertedoiros incontrolados. En zonas próximas ao río, algunhas de humidais, nos concellos de Cabanas e de Fene, entre Laraxe e Os Casais, existen máis de dez puntos de vertedoiros incontrolados que invaden a zona de policía e aumentan en dimensións e número semana a semana.

Tala da vexetación de ribeira. Hai uns meses procedeuse á tala total da vexetación de ribeira ao paso por Vilar de Colo, depositando a maior parte da fronza no cauce do río. Este  feito xa foi denunciado pero ata o momento non se produciu ningunha actuación para liberar o leito.

Depósito asfáltico. Centos de miles de toneladas de refugallos asfálticos contaminantes, procedentes de Holanda, seguen depositados nun terreo forestal de Cabanas invadindo a zona de policía do río e escoando as escorrentías cara ao humidal da beira do mesmo e finalmente á ría de Ferrol.

Nun tempo en que a sociedade vai tomando conciencia sobre diferentes formas de maltrato, cremos que chegou a hora de denunciar enerxicamente o maltrato medioambiental que, en definitiva, inclúe o maltrato ás persoas, aos animais e ás plantas. Cada vez que transiximos e non esiximos renunciamos aos nosos dereitos, perdemos calidade de vida e facémonos cómplices dos transgresores.

Os integrantes da plataforma denunciante vimos traballando dende hai tempo para evitar estes atropelos, conseguir a reversibilidade e a recuperación integral dun espazo de extraordinario valor patrimonial.