Galicia Ártabra Digital Noticias de Ferrol y la comarca de Ferrolterra.
O pleno municipal aprobou na sesión ordinaria celebrada esta noite unha declaración institucional en demanda dunha inmediata carga de traballo para o sector naval. O texto, presentado como moción por Ferrol en Común, e que estaba incluído no punto número 14 da orde do día, foi finalmente levado ao pleno como declaración institucional tras o acordo dos catro grupos políticos da corporación. Este punto votouse en primeiro lugar e obtivo o respaldo dos 25 edis.
A continuación, tras a previa aprobación dos borradores das actas das sesións anteriores, correspondentes ás celebradas os días 27 e 30 de xaneiro e 12 e 20 de febreiro (extraordinarias) e 30 de xaneiro (ordinaria), deuse conta das resolucións ditadas pola Alcaldía e os seus delegados no período comprendido entre os días 16 de xaneiro e 14 de febreiro e dos expedientes de omisión de fiscalización.
O punto número 4, a proposta de aprobación do expediente de omisión de fiscalización previa da relación de facturas, contou cos apoios de PSOE (8) e FeC (3), mentres que PP (12) e BNG (2) se abstiveron.
Por parte da Tesourería, deuse conta da liquidación do Orzamento de 2019 e do informe de morosidade e do período medio de pago correspondente ao cuarto trimestre de 2019, de cumprimento de prazos Ley 15/2010.
O punto número 7 da orde do día, a proposta de aprobación da corrección de erro material na EDUSI «Ría de Ferrol, Cidade 2020» que afecta ás liñas de actuación LA06 e LA07, foi aprobado por unanimidade.
Por parte da área de Igualdade, no punto número 8 deuse conta das vítimas mortais por violencia de xénero, dende o 1 de xaneiro ata o 18 de febreiro de 2020. A continuación, votouse a proposta de aprobación da Declaración Institucional do 8 marzo de 2020, que tamén contou co apoio de todos os edís.
En canto ás mocións, debateuse primeiro a incluída no punto número 12, do grupo municipal popular, relativa á construción dun campo de fútbol en San Juan no Concello de Ferrol. Aprobouse por unanimidade.
A continuación, foi o turno para a de Ferrol en Común pola accesibilidade no Concello de Ferrol (punto número 15). O BNG propuxo unha emenda no sentido de demandarlle ao goberno local a elaboración da ordenanza de accesibilidade universal, á que se uniu o PP e que foi aceptada. Logrou a unanimidade a favor.
O seguinte punto que se abordou foi o 13, a moción do grupo municipal Popular relativa á adopción de medidas de apoio á festa das Pepitas de Ferrol. Contou cos votos a favor de PP (12), PSOE (7) e FeC (2). O BNG (2) abstívose.
O BNG defendeu despois a súa moción relativa ao barrio de Recimil (punto 16). Aprobouse por unanimidade.
O pleno finalizou coas dúas mocións presentadas polo PSOE. A primeira delas, sobre o financiamento das entidades locais na prestación do servizo de axuda no fogar (punto 10 da orde do día), foi aprobada con 13 votos a favor (PSOE, FeC e BNG) e 12 en contra (PP). A segunda (punto 11), sobre o plan marco da Xunta de Galicia para a mellora de camiños rurais, foi retirada.
