O luns abre o prazo para inscribirse na Xornada de Inclusión Social con motivo do Día das Persoas sen Teito

O próximo luns, 21 de outubro, abre o prazo de inscrición na Xornada de Inclusión Social que organiza a concellería de Benestar Social con motivo do Día das Persoas sen Teito que se conmemora o último domingo deste mes. A concelleira, Eva Martínez, explicou que aínda está aberto ao público en xeral, os interesados en obter un diploma de asistencia deben formalizar a súa inscrición na páxina web do Concello de Ferrol.

A xornada terá lugar o 29 de outubro no salón de actos do Edificio Social (rúa Sánchez Barcáiztegui, 35-37). Ás 9 horas a concelleira inaugurará o acto e a continuación dará comezo a conferencia Plan de atención ás persoas sen fogar de Galicia, a cargo de Ledicia Suárez Rodríguez, técnica da Consellería de Política Social (Dirección Xeral de Inclusión Social). Ao terminar, Joseba Gaya Mandaluniz, educador social e responsable da área persoas sen fogar de Cáritas Bizkaia ofrecerá a conferencia Traballando polos dereitos das persoas sen fogar. Tendencias de intervención: Beste Bi como ferramenta para a loita contra o senfogarismo.

Tras un debate coloquio moderado por Alberto Alejandro Tapia, do grupo de traballo de persoas sen fogar, e unha visita ao Centro de Día de Inclusión Social de Cáritas, ás 12.30 horas terá lugar a conferencia Combatemos as mentiras e os prexuízos xunto ás persoas sen fogar: #ContrAporofobia, de Xosé Cuns, director da Rede Galega Contra a Pobreza (EAPN).