Galicia Ártabra Digital Noticias de Ferrol y la comarca de Ferrolterra.
As Xuventudes Socialistas de Ferrol (XSG-Ferrol) lamentaron hoxe que o candidato aalcaldía do Partido Popular, José Manuel Rey Verela, «queira mirarse no espello de Pablo Casado para traer a Ferrol as políticas machistas, de enfrontamento e de retallos que propugna o líder popular alí por onde pasa«.
O secretario xeral da agrupación municipal, Aitor Rodríguez, lamentou que Rey Varela “non se teña desmarcado da política de crispación, retroceso e machismo do Sr. Casado que o único que promove cos seus discursos de insultos e descualificacións é a volta á época das cavernas. Preguntámonos se ese é o modelo que quere Rey Varela para a nosa cidade.”
Rodríguez apuntou que “os ferroláns xa saben que ocorre cos servizos sociais cando goberna o PP, polo que non fai falla que o candidato popular traia ao machista Casado para ‘presumir’ e explicarnos o seu modelo: recortes, privatizacións e moitos eufemismos”.
Así mesmo, os mozos socialistas mostráronse sorprendidos de que Rey Varela critique ao Goberno socialista que “garante a carga de traballo dos estaleiros de Navantia e que dará moitas oportunidades aos mozos e mozas ferrolás, pero cale ante o machista Casado, cando o seu Partido é o responsable do atraso de dous anos na construción das fragatas F-110, sen importarlle as familias afectadas na nosa comarca e todos os mozos e mozas que teñen que abandonar a súa cidade por non atopar traballo.”
Rodríguez resaltou o irónico que resulta que “o Partido Popular celebre unha Convención de Benestar Social, cando levan meses bloqueando no Congreso a tramitación das numerosas medidas sociais do Goberno de Pedro Sánchez, e ademais o faga en Ferrol para que o exconselleiro de Política Social, Rey Varela, o aplauda sen pudor”.
Os mozos socialistas dixeron a Rey Verela que “o que precisa Ferrol, non é un alcalde que vai da man dun líder da dereita reaccionaria cunha visión da política baseada no retroceso, nos recortes de dereitos e liberdades e na confrontación”, polo que lle advertiron que eses discursos e políticas se encontrarán de fronte con “centos de mozos e mozas ferrolás que queren ter un futuro na súa terra e seguir crecendo, estudando, traballando e formando a súa familia na súa cidade con dereitos e liberdades”.
As XSG-Ferrol concluíron lamentando que “alguén que quere ser alcalde de Ferrol estea máis preocupado por agradar e aplaudir ao seu líder machista que polos problemas reais aos que a diario se enfronta a veciñanza de Ferrol, e en especial á súa mocidade, que se ve obrigada a marchar da nosa terra por falta de oportunidades”.
