Foro Ferrol Vivo inicia dúas novas campañas nas redes para promocionar os espazos naturais do municipio

Despois do éxito da campaña de recuperación de espazos degradados #SálvaoCunSelfie, e da dirixida a dar máis visibilidade ás mulleres no deporte local, a través de #ElasTaménXogan, o Foro Ferrol Vivo leva a cabo nestes meses de verán dúas novas iniciativas que teñen nos espazos naturais e no coidado do medio os seus eixos fundamentais. Así, ao longo de xullo e agosto, as persoas que o desexen poderán subir imaxes a Twitter co “hashtag” #NaturalmenteFerrol ou #FacémoloNatural, nomeando a @unferrolvivo, ou ben mandalas á dirección de correo unferrolvivo@gmail.com. As mesmas deben ser de espazos naturais, no primeiro dos casos, ou de situacións relacionadas co coidado do entorno (como recollida selectiva, limpeza de praias, etc.).

Coa primeira das campañas o que se pretende é poñer en valor un municipio que se caracteriza por ofrecer infinitos espazos naturais únicos e con encanto, tanto no que se refire a praias e costa, como no referido a zonas verdes e de lecer. Aínda que poderán saír inmobles, o que debe destacar nas fotografías é o natural sobre o arquitectónico.

A segunda, #FacémoloNatural, nace co obxectivo de lembrar a importancia que ten o respecto e coidado do medio para, precisamente, dispor de espazos naturais limpos e libres de residuos e contaminación. Polo tanto, poderán ser imaxes de denuncia, reivindicación ou ben de apoio a unha determinada acción ou política medioambiental. Como na primeira campaña, o nome de hashtag xoga coas palabras e o seu significado, de modo que sexan lemas atractivos ao tempo que informativos e didácticos.

Unha vez que remate o verán, o Foro Ferrol Vivo recollerá todas as fotos que teña recibido, tanto no Twitter como as que cheguen ao correo e posteriormente colgue nas redes sociais –Twitter e tamén a páxina de Facebook, Foro Ferrol Vivo- e fará un traballo sobre as mesmas.