Carlos Casares protagonista no Día das Letras Galegas da Agrupación Instructiva Caamouco

A Agrupación Instrutiva de Caamouco celebra con poesía a edición deste ano das Letras Galegas. Da man do Grupo Fantasía, a Sociedade renderá homenaxe a Carlos Casares, o autor recoñecido neste 2017 pola Real Academia Galega.

Para a ocasión, o colectivo poético preparou un recital no que os textos de Carmen Sarmiento e Javier Vilasánchez, dous poestas aresáns, se mesturan con algúns dos versos máis célebres de Rosalía de Castro, coincindo co 180 aniversario do seu nacemento. Á iniciativa tamén conta co acompañamento da mestra de música e pianista Laura Morgade, encargada de poñerlle a nota musical ao recital.

O acto celebrarase o sábado 20 de maio ás 18 horas. A entrada, como sempre, libre e de balde.

O Grupo Fantasía está composto por un conxunto de aresáns afeccionados á poesía que, ademais, participaron ou participan en grupos teatrais. O colectivo naceu no ano 2016. Dende aquela actuaron xa en varios puntos da comarca, incluída a Agrupación Instrutiva de Caamouco, no mes de outubro do pasado ano.

Teatro en Limodre

Ademais, o Grupo de Teatro da Agrupación Instrutiva de Caamouco levará o seu traballo á veciña parroquia de Limodre, en Fene.

Será o vindeiro sábado 20 de maio, pero ás 20 horas, cando os actores e actrices da Tenencia suban as táboas da Asociación de Veciños de Limodre co seu primeiro proxecto, Escenas Escollidas, unha escolma seleccionada pola directora do grupo, Eugenia Sanmartín.

Esta será a cuarta actuación da «xira» do grupo teatral de Caamouco, tras o seu paso polo Centro de Día do Pombal, o Cine Adriano de Barrallobre e a Asociación Agarimo de Sillobre. O colectivo estreouse diante do público no centro social da Agrupación hai menos dun ano, o pasado 1 de xullo.