O bravú de Xurxo Souto co alumnado do instituto de Canido

Un dos máximos expoñentes da historia do rock galego, Xurxo Souto, tivo a ben ilustrar o alumnado do instituto de Canido coa súa sabedoría e experiencia musical.

O polifacético cantante, músico, profesor, contador de historias e escritor, baixo os actos do «Proxecto Gz. Música na Filial» que pretende achegar aos cativos e cativas o idioma galego a través da música, fixo as delicias da mocidade presente, que interactuou en varios temas da historia do rock galego co artista.

Con varios libros e discos no seu palmarés, Xurxo Souto reflectiu a relación do idioma galego e o rock, pois ambos foron da man nunha época no que facer determinados estilos musicais en galego era pouco frecuente ou case inexistente.

Logo dun breve percorrido pola historia do rock e atender diversas preguntas do alumnado, o acto rematou cos aplausos de quen hoxe xa sabe un anaco máis da relación do idioma galego e o rock.