Inaugurouse no Cantón a XXVII Feira do Libro de Ferrol

‘A patria na palabra’. Con este verso na lembraza de Manuel María, o poeta ao que este ano se lle adica o Día das Letras Galegas (17 de maio), inaugurouse na tarde deste mércores a XXVII edición da Feira do Libro de Ferrol, a segunda de cantas se celebran en Galicia que abre as portas cun programa extenso e completo que empurra o Concello de Ferrol, a través da Concellería de Educación e que mesmo foi cualificado de ‘magnífico’ pola Xunta de Galicia.

Oito casetas de libreiros galegos, na mesma liña de edicións anteriores, dan forma a esta feira instalada baixo carpa aberta na Praza da Constitución, no Cantón de Molíns, a que se suman de novo as Biliotecas Municipais de Ferrol e Narón, ademais do punto de información e da caseta ebook da Deputación da Coruña.

A inauguración oficial iniciouse  ás 19:30 co pregón a cargo do profesor e escritor Antón Cortizas e coa participación, xa tradicional, do Real Coro “Toxos e Froles”. Estiveron presentes o concelleiro de Educación, Suso Basterrechea, e Nani Regueira,  xerente da Federación de Libreiros de Galicia.