O BNG de Ferrol presenta unha moción pola mellora dos servizos ferroviarios

O Bloque Nacionalista Galego de Ferrol rexistrou na mañá deste venres unha moción para o seu debate no pleno da corporación coa que pretenden «poñer fin á discriminación que ten sufrido durante décadas á nosa cidade en materia ferroviaria e que contou coa colaboración e pasividade dos gobernos municipais e ademais para reclamar unha actuación urxente na liña ferroviaria entre Ferrol e A Coruña que a permita sacar do obstracismo na que os sucesivos Gobernos a mantiveron».

Despois durante anos diversas iniciativas na defensa dun servizo ferroviario digno para Ferrolterra, os nacionalistas destacan que «cumpre actuar decididamente para acadar o incremento dos servizos ferroviarios, así mesmo consideramos que o problema da situación do ferrocarril non se resolve unicamente pedindo unha entrevista co Ministerio de Fomento e esixe ao goberno local que se preocupe por manter viva unha via de comunicación como é o transporte ferroviario en vez de querer convertila nunha reliquia para expor nun museo».

Así, o BNG de Ferrol considera que o ferrocarril «é un servizo público básico, sustentábel economicamente, que constitúe un elemento de cohesión e vertebración social, ademais de ser un factor de dinamización e equilibrio demográfico. Como medio de transporte é o elemento central dun sistema nacional de transporte intermodal e complementario, resulta o máis eficiente no que atinxe ao transporte de granel e mercadorías non perecedoiras, respectuoso co medio ambiente, e ademais fonte dun emprego de calidade».

Os nacionalistas tamén destacaron que a «día de hoxe, non é viábel coa situación actual das infraestruturas e co número de frecuencias actuais manter a medio e longo prazo o ferrocarril no itinerario Ferrol-A Coruña por resultar obsoleto e ineficiente socialmente, xa que os tempos de viaxe fanse excesivos para atender e cubrir as necesidades de transporte en todo o itinerario por motivos de traballo e estudo».

É por iso que o BNG propón que o pleno do concello aprobe os seguintes acordos:

1.- Reclamar do Goberno do Estado que desista do proceso de desmantelamento de servizos ferroviarios no noso país, e de calquera tipo de proceso privatizador da xestión da empresa en calquera das súas seccións, reclamando o mantemento das liñas existentes e o incremento dos servizos e frecuencias que se veñen prestando en territorio galego e en concreto a liña Ferrol-A Coruña.

2.- Sendo Conscientes de que, sen mellora das infraestruturas, non é posibel que o tren Ferrol-A Coruña teña futuro, tanto para viaxeiros como para mercadorías, demandamos a execución, a curto prazo, dun by-pass en betanzos Infesta para facer posíbel que a duración da viaxe non execda de 1 hora, e a medio prazo, a modernización da infraestrutura, con dupla vía, electrificación e eliminación de

3.- Reclamar do Goberno do Estado restaurar as paradas, polo menos como facultativas, dos actuais servizos de media distancia Ferrol-A Coruña, que foron eliminadas, deixando sen servizo ferroviario a maioría dos concellos do itinerario.

3.- Reclamar do Goberno do Estado a posibilidade de se poderen usaren os trens a e desde Madrid, como servizos de media distancia, cos prezos de billete acordes con esta clasificación, no itinerario Ferrol-Lugo-Ourense, e Ferrol-Coruña-Santiago, como forma de colaborar á conexión desta comarca co resto da Galiza.

4.- Demandar do Estado as transferencias en materia de ferrocarril interior, xunto cun financiamento axeitado, co obxectivo de crear unha compañía pública ferroviaria galega que mellore a prestación deste servizo no noso país e permita acometer as infraestruturas e desenvolver os servizos de transporte ferroviario na Galiza que contribúan a vertebración económica, social e territorial do país.