Peticións veciñais de Doniños, dos montes de San Xurxo e de Menáncaro

O Concello de Ferrol estudará as peticións formuladas pola Xunta Veciñal de Doniños e polos veciños dos montes de San Xurxo e da Fraga de Menáncaro.

Na mañá deste luns a primeira tenente de Alcalde, Beatriz Sestayo, e a concelleira do Medio Rural, Rosa Méndez, mantiveron reunións cos distintos colectivos veciñais para escoitar as súas peticións á administración local.

Segundo explicaron ao termo das reunións, dende o Concello se asumiu o compromiso de xestionar con axilidade a solicitude de que Fomento realice determinadas obras en Doniños, que están pendentes dende hai anos, así como estudar a posibilidade de acometer intervencións menores que lle corresponden ao Concello, como as referentes á sinalización vertical.

En canto a Menáncaro, na reunión, na que tamén participaron membros de entidades ecoloxistas, asumiuse o compromiso de estudar o establecemento de proteccións de carácter ambiental de distintos enclaves únicos, entre eles a Fraga, que se teñen que protexer e por en valor, ao tempo que se traballará para continuar coa protección e ampliación a zonas con vexetación autóctona.

Finalmente, os veciños dos Montes de San Xurxo expuxeron problemáticas que estaban pendentes de ser abordadas polo goberno local e que nalgúns casos teñen que ver coa legalidade urbanística así como con distintos procesos de expropiacións.