A «XXV Xuntanza de Gaiteiros» homenaxea a «Xacarandaina»

O sábado, día 5 , a partir das 19.30 horas na S.C.R.D. Agarimo de Sillobre (Fene), a Banda de Gaitas Tradicional “Airiños de Fene” celebrará a XXV Xuntanza de Gaiteiros, actividade que organizan tódolos anos dende o 1988.

Nestas xuntanzas, ademais da participación de distintas bandas, grupos ou músicos, aproveitan a ocasión para realizar unha homenaxe a algunha persoa, grupo ou entidade que se caracterizou por gardar, recoller, recuperar e dar a coñecer a nosa música tradicional. Nesta XXV Xuntanza  se homenaxeará á Asociación Cultural “Xacarandaina” de A Coruña.

Xacarandaina nace no ano 1978. O seu obxectivo era e é a investigación, a interpretación e a difusión do noso folclore do xeito máis fiel posible de como se atopa no seu lugar de orixe. Xacarandaina fixo e fai un importantísimo traballo de campo recuperando músicas, bailes, danzas, cancións, instrumentos e traxes autóctonos. Froito desta labor o grupo ten recollidos e montados máis de 150 bailes e outras tantas pezas de música que interpretan nas súas actuacións.

Participantes na Xuntanza

Nesta XXV Xuntanza de Gaiteiros contarase coa participación do grupo de cantareiras, do grupo de cantareiros e do grupo de música e baile tradicional de “Xacarandaina”, con “Sons do Mendo” o grupo de cantareiras “Xerfa” e a Banda de Gaitas Tradicional “Airiños de Fene”. A Xuntanza será presentada por Pitusa Arias.