Galicia Ártabra Digital Noticias de Ferrol y la comarca de Ferrolterra.
A Deputación da Coruña deu lectura ao principio da sesión celebrada este mércores, día 31, e tras gardar un minuto de silencio a unha declaración institucional en memoria das vítimas do accidente ferroviario acontecido o pasado mércores en Santiago de Compostela. Con este texto, tódolos grupos políticos que conforman a corporación expresaron o seu apoio ás familias da vítimas mortais. Tamén quixeron trasladar ás persoas feridas e os seus familiares o seu desexo dunha pronta recuperación. Ademais, con esta declaración valórase o esforzo desenvolvido por tódolos profesionais que atenderon aos afectados, aos veciños e veciñas que colaboraron nas tarefas de rescate e a tódalas persoas voluntarias que se ofreceron para doar sangue, amosando a súa xenerosidade e solidariedade.
Da mesma forma, os tres grupos políticos representados no pleno quixeron mostrar o seu apoio aos traballadores de Megasa. A través dunha segunda declaración institucional, a Deputación da Coruña manifestou o seu respaldo e solidariedade ao conxunto dos traballadores da empresa con sede en Narón. A través desta alegación, a Deputación pediu unha solución normativa satisfactoria que garante a libre competencia no sector siderúrxico, permitindo garantir a viabilidade da empresa, así como os postos de traballos que esta xera, xa que o peche desta fábrica tería unha nefasta repercusión para o Concello de Narón, para a comarca de Ferrolterra e, por extensión, a toda a provincia da Coruña.
A cámara provincial tamén aprobou por unanimidade dúas mocións en apoio aos traballadores e traballadoras de Arteixo Telecom e ás persoas afectadas polas participacións preferentes e a débeda subordinada.
