Ferrol en Común acusa ao goberno local de falta de previsión ante o inicio do curso escolar no CEIP de Ponzos

FeC a través dun comunicado expresa o seguinte: «a figura do conserxe é fundamental para o bo funcionamento dos centros escolares. Este persoal está adscrito á relación de postos de traballo do concello de Ferrol, polo tanto o seu nomeamento, a cobertura de vacantes, baixas ou substitucións é totalmente dependente do goberno».

«A conserxe do CEIP de Ponzos logo dun largo período de servizo público, vén de xubilarse, e xa nos últimos meses do curso pasado foi substituída para poder garantir a prestación do servizo, polo tanto o goberno era plenamente consciente de que era necesario, a inicio do curso 26/27, o nomeamento dunha persoa que ocupase esa responsabilidade».

«Á consabida incompetencia da Xunta de Galicia, recortando profesorado de apoio en pedagoxía terapéutica ou audición e linguaxe, xa denunciado o curso anterior, agora súmase a este despropósito a inacción do Concello, que escudado tras escusas de índole burocrática e administrativa, ten ao centro, a menos dun día do inicio do curso, sen conserxe municipal. Esta vacante supón unha falta de control nos accesos e saídas, dos que a comunidade educativa ten que pagar as posibles consecuencias e da que o único responsable é o goberno local».

Dende Ferrol en Común «esiximos a cobertura inmediata da praza de conserxe municipal, así como a convocatoria do Consello Escolar Municipal, co fin de poñer en común coa comunidade educativa as posibles problemáticas de inicio de curso, e así poder anticiparse ofrecendo solucións, función que debera ser a primordial dun goberno da cidade».