Neda reabre ao público a oficina de turismo

Neda reactivou dende este martes o seu punto de información turística na caseta situada xunto ao albergue do Camiño Inglés. A caseta, que aproveita o éxito da ruta xacobea, estará operativa a diario ata o 30 de setembro.

A apertura da oficina é posible grazas a unha axuda de 11.000 euros da Deputación da Coruña, investida na contratación dunha empresa do sector. O obxectivo é potenciar a imaxe do municipio durante a tempada alta de viaxeiros e peregrinos.

Nun período estival que terá como gran atractivo o eclipse solar do 12 de agosto, o persoal da oficina guiará aos visitantes sobre o patrimonio local. Promocionaranse espazos como a fervenza do Belelle, o centro histórico, o miradoiro de Ancos ou a Festa do Pan…así como a oferta cultural e de restauración local.

Con esta iniciativa, o Concello busca elevar a calidade da estancia dos turistas para fomentar o seu regreso. Así, o espazo funcionará como centro de recepción onde selar a credencial, resolver dúbidas ou xestionar as pernoctas no albergue autonómico.