O CIRS de Cervás pecha a programación co gallo das Letras Galegas

Este sábado 31 remata a intensa programación que o CIRS de Cervás artellou co gallo das Letras Galegas deste ano, adicados á tradición oral e ás pandeireteiras que a mantiveron viva. Unha programación que comezara coa presentación do disco-libro de Xabier Díaz «Cancioneiro galego serodío» o pasado 14; e que agora vai rematar na mesma liña.

 

 

Será X. Luis Rivas «Mini» -unha figura icónica na nosa música: fundador de «Fuxan os Ventos» e «A Quenlla» e colaborador con diversos grupos e intérpretes das nosas músicas- quen realizará unha viaxe contada e cantada pola nosa  música tradicional,nun acto que terá lugar no CIRS de Cervás o sábado día 31 de maio a partir das 19,30 horas.

Nas mesmas instalación fica ubicado o mural realizado por nenas e nenos de Cervás, recreando debuxos que fixera Castelao sobre músicos tradicionais: cantareiras, gaiteiros, bailadoras…