Comeza a sexta edición do programa integrado de emprego das Pontes

A sexta edición do Programa Integrado de Emprego de Galicia e o Servicio Público de Empleo Estatal, en colaboración cos Concellos da Capela e As Somozas, subvencionado pola Consellería de Emprego, Comercio e Emigración da Xunta de Galicia e cofinanciado polas entidades Local, arrincou, esta semana, coa posta en marcha dunha actividade formativa dirixida a obter o certificado de manipulador de alimentos.

Ana Pena, concelleira responsable da área de emprego agradeceu a participación do alumnado nesta nova iniciativa formativa, que forma parte do catálogo de 14 cursos e sesións que conforman o Programa Integrado de Emprego, subliñando a importancia deste tipo de iniciativas, que . permiten mellorar as aptitudes laborais de colectivos con especial dificultade para acceder ao mercado laboral. Neste senso, a concelleira de Emprego apuntou que, “en edicións anteriores do Programa Integrado de Emprego, as cifras de inserción laboral superaron o 50% das persoas participantes, uns números que nesta nova convocatoria confiamos en incrementar”.

O Programa Integrado de Emprego do Concello das Pontes, cunha duración de 12 meses, está dirixido á mellora da ocupabilidade e á inserción laboral de 100 persoas demandantes de emprego, con maiores dificultades para acceder ao mercado laboral, mediante diferentes accións formativas.

A través deste programa formativo ofreceráselle ao alumnado participante unha ferramenta de axuda e acompañamento especializado co que desenvolver as súas competencias persoais, sociais e laborais, acrecentando a súa empregabilidade para situarse, deste xeito, nunha situación máis favorable cara o mercado laboral.

O Programa Integrado de Emprego das Pontes inclúe un amplo abano de accións informativas, asesoramento, orientación laboral, de carácter individual, e un conxunto de sesión grupais organizadas entorno a adquisición de coñecementos sobre elaboración de currículum vítae, cartas de presentación, entrevistas de traballo así como habilidades sociolaborais e clases de coaching, intelixencia emocional e motivación laboral, entre outras.

Ao mesmo tempo, o alumnado adquirirá competencias profesionais demandadas polo tecido industrial e comercial da contorna a través de cursos e obradoiros sobre operacións con plataforma elevadora e operacións con carretilla elevadora con prácticas non laborais en empresas así como operacións con carretilla transpaleta e apilador (Categoría 1, Tipos 1 e 3). Tamén haberá formación para obter o título de monitor de tempo libre e formación con prácticas non laborais en empresas sobre limpeza en instalacións e equipamentos e carpintería metálica.

O Programa Integrado de Emprego das Pontes tamén inclúe cursos de iniciación en competencias dixitais básicas, competencias dixitais básicas para o emprego, formación en igualdade de oportunidades, un curso básico de prevención de riscos laborais así como español elemental para persoas estranxeiras e unhas xornadas de motivación emprendedora.

As persoas participantes no Programa Integrado de Emprego terán dereito a percibir unha bolsa consistente en 10 euros por día de asistencia ás accións do programa e o Programa Integrado de Emprego cubrirá os gastos de coidado e/ou atención a persoas dependentes das persoas participantes para facilitar a asistencia ás distintas accións do programa (menores de 3 a 12 anos).

O orzamento do Programa Integrado é de 175.000€ euros, dos cales 140.000 euros son aportados pola Consellería  Consellería de Emprego, Comercio e Emigración da Xunta de Galicia e o Servicio Público de Empleo Estatal, e 35.000 euros polas entidades locais.