A Deputación organiza o primeiro encontro das IXP de Viño de Galicia

A área de turismo da Deputación de A Coruña, liderada polo vicepresidente Xosé Regueira, presentou as primeiras xornadas das IXP de Viño de Galicia na provincia, que terán lugar os días 23 e 24 de febreiro no NH Finisterre.

Regueira, acompañado do catador e profesor de viño, Luis Paadín e a coordinadora das IXP de Galicia, Maite Maestre, explicaron os detalles dun programa composto por máis dunha vintena de actividades entre presentacións, catas e obradoiros, que contará coa participación de representantes das principais adegas e IXP de Galicia.

O vicepresidente enmarcou este evento na campaña ‘A paisaxe que sabe’, “coa que pretendemos humanizar a paisaxe, contando con persoas que viven e producen alimentos, e neste caso viño, de altísima calidade, e eso é un valor engadido para os turistas, que encaixa á perfección na nosa estratexia de promoción turística” sinalou. “A enogastronomía e a gastronomía son elementos esenciais, para nós, de promoción do territorio, por iso lanzamos este evento sobre o viño no que reunimos a IXP da provincia pero tamén do país, porque se trata dunha promoción global”.

Regueira destacou tamén a importancia de “reivindicar o viño da provincia, e os profesionais que están facendo un traballo excepcional” e rematou dicindo que “o viño é moito máis que unha bebida: é tradición, historia, patrimonio, territorio, identidade… e ten un inmenso potencial para captar a un turismo de calidade e respectuoso co medio”.

A coordinadora das IXP de Galicia, Maite Maestre, falou da necesidade de “dar a coñecer as diferencias entre as paisaxes, que se plasman nas diferencias entre culturas e procesos tradicionais que preservamos de viticultura”. Tamén agradeceu o apoio da Deputación, “para poder levar a cabo este primeiro encontro no que amosaremos viños que elaboramos desde lugares tan diferentes como Betanzos ou o Morrazo”.

Ademais, Maite Maestre falou das IXP que representan “pequenas producións de artesanía, pois son pequenas bodegas moi vinculadas ao turismo local e sostible, que participarán neste evento no que imos ter aos propios elaboradores facendo catas dos seus viños e falando da importancia dos territorios nos que traballamos”.

Pola súa parte, Luís Paadín referiuse “ao patrimonio vitivinícola galego”, que é “único” e forma parte “da nosa idiosincrasia”. O sumiller tamén se referiu á necesidade de poñer en valor este sector, así como as pequenas IXP, “que son pequenas porque non tiveron forma de crecer, pero a singularidade dos seus viños e dos seus procesos fanas diferentes e únicas, e complementarias ás outras que temos en Galicia”. “A mellor maneira de representar o que temos é demostrar o que somos” expresou Paadín, “e estas pequenas bodegas que poderemos coñecer neste evento grazas á Deputación e traballan a escala humana están contribuíndo a un turismo enogastronómico de calidade e máximo respecto, creando un produto artesán, exclusivo e moi descoñecido, que temos que poñer en valor. Están, en resumo, sendo capaces de meter a paisaxe nunha botella”. E, concluíu, “temos que coñecer o noso traballo aquí, no propio territorio, poñernos caras e defender e apostar polo noso, e este encontro servirá para todo iso”.

Un total de 16 adegas conforman un programa deseñado Cco obxectivo de poñer en valor os viños e as adegas da Asociación das IXP de Viño de Galicia, e dividido en dúas xornadas destinadas tanto á cidadanía en xeral como a un público profesional do sector da hostalaría e restauración.

A primeira delas, o domingo 23, contará cun túnel do viño, de 12 a 20 horas, con catas cada media horas das bodegas Panchín e da Señora (IXP Terras de Navia); Os Areeiros, Ardán 100 Polas; Mercedarios Mosteiro de Poio e Videiras no Mar (IXP Ribeiras do Morrazo) e Adega entre Os Ríos; Castellum Augusti e Cazapitas (IXP Barbanza e Iria).

E, a segunda, o luns día 24, comezará ás 11 horas coas presentacións de Adega Bordel e Adegas Rilo (IXP Viño da Terra de Betanzos); ás 12 horas coa inauguración e a presentación da web “Viños da Coruña”, con Xosé Regueira; ás 12 horas coa masterclass a cargo de Luis Paadín; e de 16 a 18 horas, presentacións de Pagos de Brigante e Casa Beade (IXP Viño da Terra de Betanzos) e Adega Terras Mancas e Adega Ferreiros (IXP Val do Miño, Ourense).

O evento pechará cun taller de Luis Paadín.