Galicia Ártabra Digital Noticias de Ferrol y la comarca de Ferrolterra.
O auditorio da Casa da Cultura de Valdoviño acollerá este venres 29 o pase da aclamada longametraxe «O Corno», da cineasta donostiarra Jaione Camborda, Concha de Ouro da 71a edición do Festival de Cine de San Sebastián e primeira realizadora española en acadar o galardón. A cinta convertíase tamén na gran trunfadora dos Premios Mestre Mateo do audiovisual galego, conquistando sete galardóns.
Entre eles, o de Mellor Longametraxe, Dirección e Guion. Precisamente, este venres chega a Valdoviño da man do Ciclo Mestre Mateo, cunha proxección que arrincará ás 20:30 horas con entrada de balde e libre ata completar aforo.
«O Corno» é unha coprodución hispano-belga-portuguesa rodada en galego, protagonizada por Janet Novás, Premio Goya á mellor actriz revelación. Está ambientada en Galicia, na década dos 70, e presenta a historia de María, unha muller que se gaña a vida mariscando.
Tamén é coñecida por axudar a outras mulleres nos seus partos con especial dedicación e coidado. Tras un inesperado suceso, vese obrigada a fuxir e comeza unha perigosa travesía que lle fará loitar pola súa supervivencia. Buscando a súa liberdade, María decide cruzar a fronteira por unha das rutas de contrabando entre Galicia e Portugal.
