18 autores participan na I Edición do LiterAres

A próxima fin de semana, Ares contará cunha boa mostra da mellor literatura de proximidade, mais tamén con autores e autoras de renome, xa consolidados dentro do sector editorial galego. Será no marco dun novo evento que recalará no municipio este sábado, 22 de xuño, coa súa primeira edición, o LiterAres, e a través da colaboración entre o Concello e a Asociación Galega de Escritoras e Escritores (AGER).

Así, a concelleira de Cultura, Alma Barrón, e o delegado en AGER de Ferrol, Pablo J. Rañales, presentaron a programación no consistorio aresán, un acto que serviu para debullar todas as actividades que poderán desfrutar veciñanza e lectores da comarca.

“Neste LiterAres, quixemos homenaxear á literatura de proximidade, con autores da nosa zona e mesmo do municipio, mais tamén que puideramos achegarnos a outras disciplinas como o recital poético ou a música e incluso incorporar a memoria da emigración indiana”, salientou Barrón no acto.

Dende AGER, e como autor participante, Rañales fixo fincapé “na diversidade das actividades deste evento, con conversas sobre o misterio e o terror en Galicia, os procesos creativos detrás do arte ou mesmo sobre a necesidade de conectar coa mocidade a través da literatura”.

Ambos axentes expoñen que a Alianza Aresana, o epicentro de toda esta xornada literaria, recibirá a 18 autores e autoras en total nas diferentes iniciativas deste LiterAres en diferentes áreas do edificio, tanto interiores como exteriores, para “celebrar a cultura e gozar da literatura” dende o popular.

Unha programación variada con figuras como Arantza Portabales e Antía Yáñez

A xornada arrancará ás 11:00 horas no salón de actos da Alianza, cunha breve inauguración por parte das dúas entidades involucradas, e continuará xa coa primeira das charlas ás 11:15 horas, Literatura e emigración: escribir dende a memoria, onde interveñen Nones Araújo, gañadora do Premio de Novela Curta do Concello de Ares ALÉN 2023, xunto con Alma Barrón, edil de Cultura, e coa moderación da editora de Hércules de Ediciones, Laura Rodríguez.

Ás 12:00 horas, en formato exterior e con vermú incluído, o ilustrador e autor de banda deseñada aresán, Antonio Seijas, conversa co escritor Pablo J. Rañales sobre os seus procesos creativos, linguaxes artísticos e formas de inspirarse no Vermú artístico: crear e ollar dende Ares.

A mañá rematará coas autoras Andrea Maceiras e Antía Yáñez, de 13:15 a 14:15 horas, moderadas polo xestor cultural Iago Fandiño, na charla Literatura infantil e xuvenil: o reto de conectar coa mocidade.

O LiterAres retomará a súa actividade ás 17:00 horas, cun obradoiro de marcapáxinas no cuarto de contos da Alianza Aresana para os máis pequenos, e a sesión de micro aberto ás 18:00 horas, onde poetas, narradores e os músicos da Asociación Cultural Xábrega encherán de música e poesía a partes iguais.

De 19:00 a 20:00 horas, Juan Galán, Teresa Cameselle, María Nieto e Micaela Barbeito asinarán os seus exemplares coas librarías locais Nin Idea e Áncora e, como peche a todo o evento, Arantza Portabales e Natalia Monje afondarán nas particularidades do misterio e terror na literatura galega na conversa Unha Galicia de lenda ás 20:00 horas.