Este sábado terá lugar a gran festa infantil Cidade de Narón

A gran festa infantil cidade de Narón organizada polo Concello e coa que cada ano se celebra o remate do verán retómase tras dous anos suspendida pola situación sanitaria derivada da pandemia da covid-19.

A concelleira de Festas, Natalia Hermida, anunciou que a cita terá lugar este sábado, día 3 de setembro, no parque de Freixeiro. “Todos os nenos que se acheguen poderán desfrutar dunha completa xornada con diferentes propostas que se sucederán ó longo da mañá e da tarde”, indicou Hermida.

Unha festa “holi”, outra da escuma, inchables acuáticos, un circuíto de karts, un inchable xigante e pintacaras forman parte das propostas organizadas para a ocasión. “Todas estas propostas son de balde, polo que poderán desfrutar de todas elas nos espazos habilitados no parque de Freixeiro en horario de 12.00 a 14.00 e tamén pola tarde, de 16.00 a 20.00” asegurou Hermida.

A concelleira naronesa animou ás veciñas e veciños de Narón “a achegarse este sábado ó parque de Freixeiro para desfrutar dunha xornada de diversión que suporá o colofón final na cidade á tempada estival, xusto antes de que os nenos regresen ás aulas para iniciar o novo curso escolar”.