Galicia Ártabra Digital Noticias de Ferrol y la comarca de Ferrolterra.
A portavoz nacional do BNG, na súa visita a ría de Ferrol para coñecer o actual estado do seu saneamento, anunciou que o BNG presentará no Parlamento galego unha iniciativa para reclamar un modelo “eficaz, seguro e moderno” na área de saneamento e depuración coa separación de augas pluviais e fecais. “Reclamos unha revisión do xa executado e todo o novo que se leve adiante”.
Ademais, considerou “ilóxico” que unha depuradora de carácter supramunicipal non sexa xestionada pola Xunta e sexa cargada ao concello.
O BNG, engadiu, leva moito tempo reclamando un plan de rexeneración integral da ría de Ferrol, “moi castigada pola contaminación” que conleva unha importante perda de postos de traballo no marisqueo e actividades relacionadas co mar.
Pontón denunciou que o Estado “non porá un só euro e que esta decisión supón unha sobrecarga nos recibos para os veciños e veciñas cuestión que tamén dixo, «levaremos na nosa iniciativa para revisar un convenio no que Estado debe asumir o cen por cen das obras«.
A nacionalista insistiu no “trato inxusto” do Goberno central cos veciños e veciñas de Ferrol e Narón por unhas obras de saneamento da ría, declaradas hai 21 anos de interese xeral e o certo, explicou é que continúan “con atrasos na execución” e “trato discriminatorio” por parte do Estado. Dende o BNG, dixo, consideramos que non é xusto que unha cidade como Ferrol, xa dabondo castigada economicamente, teña que asumir o custe das obras para sanear a ría que “son responsabilidade da administración central”.
Pontón reiterou que os veciños e veciñas de Ferrol e Narón pagan os mesmos impostos que noutras partes do Estado e sen embargo “son discriminados” nun dobre sentido: por unha banda pagarán unha parte das obras de saneamento e por outra vailles ser imposto un modelo de sistema de depuración “obsoleto”.
Hoxe en día, e na maior parte dos países modernos, explicou a líder do BNG, apostase pola eficiencia e o medio ambiente e os sistemas para a depuración e saneamento diferencian entre augas fecais e pluviais e resulta “un erro” que a cidade de Ferrol non conte con este sistema.
Pontón afirmou que a taxa de saneamento non só afecta a Ferrol, tamén a marxe norte da ría e o concello de Narón terá que pagar 65 millóns de euros extras que deberá asumir a veciñanza, a pesar de ser unha obriga do Estado. O BNG en Narón así como en Ferrol votou en contra dese “taxazo”, un verdadeiro “abuso” a unha cidadanía que cada vez ten “pensións e salarios máis baixos” e nunha situación socioeconómica “grave” como a que vive esta comarca, denunciou.
O BNG seguirá reclamando que o Goberno do Estado asuma as obras para que non repercutan economicamente nos veciños e veciñas de Ferrol, concluíu a nacionalista.
Pola súa parte, o portavoz municipal do BNG en Ferrol, Iván Rivas recalcou que o Estado foi quen decidiu o modelo de rede de saneamento que se ía implantar: Un modelo de rede unitaria, con excesivos tanques de tormentas. Dende o BNG fronte este modelo reclamamos un sistema de rede separativa entre augas pluviais e fecais que reduce os volumes de depuración que o fai máis económico e sostible medioambientalmente.
Rivas salientou que foron investidos 140M€ nunha infraestrutura na que o 94% foi xestionada por “empresas coa súa sede fiscal en Madrid” que puxo en marcha un modelo se saneamento “obsoleto” baseado nunha rede cun sistema unitario que ademais nos obriga a pagar pola depuración de augas que non están contaminadas como as augas de chuvia. “Este sistema incrementa os custes para os veciños e veciñas e medioambientais a non resolver os verquidos que se seguen producindo”.
“As obras de saneamento e depuración benefician ás empresas que as constrúen a costa do erario público e da economía dos veciños e veciñas deste concello«, remarcou Rivas.
Tras a visita á ria de Ferrol, a portavoz nacional do BNG participou na concentración de persoas pensionistas ante o edificio administrativo da Xunta de Galicia acompañada polo portavoz municipal, Iván Rivas, o alcalde de San Sadurniño , Secundino García Casal e os ex-parlamentarios do BNG, Francisco Rodríguez e Xosé Díaz e destacados membros do BNG da comarca.
