Mugardos impulsa a ximnasia rítmica coa celebración dun campus

Un total de once nenas de entre catro e dez anos asisten hoxe e mañá ao Campus de Ximnasia Rítmica organizado pola área de Deportes do Concello de Mugardos. O goberno local organizou a iniciativa coa intención de impulsar unha actividade deportiva que conta na vila con certa afección. Ademais da convocatoria deste campus, recentemente a institución municipal invistiu uns 4.000 euros na compra dun tapiz.

A escola de ximnasia rítmica do Concello de Mugardos vén desenvolvéndose desde o ano 2015 e neste curso conta con 27 nenas inscritas. No campus que comezou hoxe participa, xunta á profesora de ximnasia rítmica que habitualmente leva a escola municipal, unha monitora de danza. A actividade desenvólvese de 10.30 a 13.30 horas no Pavillón Municipal do Cristo.