Galicia Ártabra Digital Noticias de Ferrol y la comarca de Ferrolterra.
O paseo marítimo de Xuvia acollerá os días 3, 4 e 5 de xuño a XI Concentración Moteira Cidade de Narón e as VI Xornadas de Turismo Activo, eventos organizados polo Motoclub Fojeteiros coa colaboración, entre outras entidades, do Concello de Narón.
O edil de Deportes, Román Romero, presentou esta mañá a convocatoria acompañado polo presidente de Fojeteiros, José López Quintián, e por Vanesa Galaso e Raquel García, vocal e tesoureira, respectivamente, deste motoclube. A organización confía en alcanzar as cincocentas inscricións de moteiros, unha cifra similar á de edicións anteriores. A convocatoria terá un apartado solidario, ao colaborar un ano máis cunha recollida de tapóns de plástico –habilitando un espazo en Xuvia para depositalos- para a iniciativa Alba, la promesa, coa que se recaudan fondos para loitar contra o cancro infantil.
A inauguración da convocatoria será o día 3 ás 18 horas, coincidindo coa apertura de inscricións e cun Mercadillo Moteiro no que se venderán diferentes artículos relacionados co mundo das motos. No paseo de Xuvia instalaranse atraccións infantís e baixo unha carpa haberá unha cea, a partir das 21 horas, a base de callos á galega, e desde as 22 horas un concerto a cargo de La Banda de Nash, Zentholos e Riff-Raff. As persoas interesadas en inscribirse poden facelo o venres, e tamén o sábado, abonando unha tarifa de 35 euros polos tres días –incluíndo a cea do venres, o xantar e a cea do sábado e o almorzo do domingo- ou 30 euros no caso de inscribirse para o sábado e o domingo –estando incluídos o xantar, unha cea e un almorzo-. As persoas que tan só desexen asistir ás comidas e ceas programadas poden facelo abonando unha cuota específica para as mesmas: 10 euros pola cea do venres; 10 euros polo xantar do sábado; 15 euros polacea do sábado e 15 euros polo almorzo do domingo.
A apertura de inscricións do sábado será ás 10:30 horas, coincidindo de novo co inicio do Mercadillo Moteiro no paseo de Xuvia. Ás 11 horas sairá a Ruta mototurística desde o paseo cara a Cedeira e San Andrés de Teixido e ás 14 horas realizarase unha parada para un xantar na ruta, na área recreativa do Castro, en Cerdido, a base de paella e pizza, para regresar de novo a Xuvia sobre as 16 horas. Ás 17 terá lugar unha exhibición de trial a cargo de Víctor Ares e Jorge Muñiz e ás 21 horas comezarase a servir a cea baixo a carpa, cun menú a base de churrasco e criollos e, ao remate da mesma, entregaranse os trofeos aos participantes. O tradicional Desfile de antorchas pola estrada de Castela, entre o paseo de Xuvia e a Ponte das Cabras, sairá ás 23:30 horas pero sobre as 23 iniciarase o reparto de bandeirolas entre o público polo citado tramo. A gran festa moteira programada para o sábado será a cargo de Dreamers Dj’s.
Por último, o 5 de maio ás 10 horas servirase un almorzo baixo a carpa e ás 11.00 partirá a Ruta mototurística pola Costa Ferrolá, con pinchada no percorrido. O xantar baixo a carpa de Xuvia a base de langostinos á prancha e xamón escaldado será ás 14:30 e ás 15 horas comezarán a sortearse agasallos entre os participantes para, ás 16:30 horas, proceder á clausura desta edición da concentración moteira.
O presidente do Motoclub Fojeteiros explicou que xeralmente se concentran na cidade durante este evento unhas 2.000 motos, o que supón a maiores contar cun público, indicou, que pode alcanzar as 10.000 persoas. O edil de Deportes naronés destacou o éxito desta convocatoria que «ademais de reunir ano tras ano na nosa localidade a moitísimos afeccionados e afeccionadas ao mundo do motor, é unha excelente oportunidade para dar a coñecer o noso concello e a nosa comarca», asegurou.
As persoas interesadas en recibir máis información poden dirixirse ao correo electrónico info@motoclubfojeteiros.com; á páxina web www.motoclubfojeteiros.com ou, para inscribirse, chamar ao número de teléfono 615 553 909.
