O Pazo da Cultura acolle este sábado a comedia «Menú da noite»

O Pazo da Cultura acollerá este sábado a representación da comedia Menú da noite, protagonizada polo actor cómico Carlos Blanco e o ilustrador Luis Davila. A representación, dunha hora e media de duración, comezará ás 20 horas e o prezo das entradas, xa á venta na taquilla do Pazo, é de 10 euros no patio de butacas e 8 euros nos anfiteatros se se compran de xeito anticipado, e de 12 euros no patio de butacas e 10 nos anfiteatros no caso de mercalas o propio día da actuación.

A obra é unha segunda entrega, tras Menú do día, na que os protagonistas vestían saias escocesas. Agora, con seus smókings, Carlos Blanco e Luis Davila suben de novo ao escenario para literalmente, cociñar en directo. Baile, animación, debuxo de viñetas en directo e música de Budiño e Kepa Junquera completarán este espectáculo no que o espectador gozará coas ocurrencias destes dous artistas galegos.