Galicia Ártabra Digital Noticias de Ferrol y la comarca de Ferrolterra.
O portavoz de Sanidade do Grupo Popular en Galicia, Aurelio Núñez, lamentou hoxe que os grupos da oposición rexeitaran instar á Xunta a poñerse en contacto co Concello de Mugardos para buscar fórmulas que permitan identificar e corrixir as deficiencias existentes no centro de saúde.
«Mentres non se produza a transferencia da titularidade deste centro de saúde desde o Concello á Xunta, as obras que se leven a cabo correspóndenlle ao Concello, que ten a obriga de entregado ao SERGAS en boas condicións», apuntou o voceiro.
Aurelio Núñez indicou que o SERGAS «sempre coa pertinente autorización do Concello, non ten inconveniente en enviar técnicos que valoren as deficiencias máis urxentes e colaborar co Concello na reparación das mesmas».
Deficiencias a reparar
O portavoz popular recoñeceu que existen deficiencias estruturais no centro de saúde de Mugardos «que se deben arranxar con certa urxencia: como é o caso da cuberta e a calefacción». «Esas reparacións máis urxentes serían unha solución provisional ata a transferencia d centro de saúde á Consellería de Sanidade», explicou.
O centro de saúde de Mugardos figura entre os 29 que se transferirán ao SERGAS en próximas datas, dentro do convenio da Xunta coa Federación Galega de Municipios e Provincias (Fegamp).
Núñez Centeno criticou deste modo que «as presas da oposición por solucionar agora os problemas do edificio sanitario de Mugardos, cando, por primeira vez na historia, está a gobernar en minoría nesta localidade o Partido Popular». «Non foron vostedes tan rápidos nin tan preocupados cando gobernaba o BNG ou incluso antes os socialistas», lamentou.
